مرحوم سيد شمس الدين مجروح

پوهاند رشتين يو ملي انسان ؤ ، په خپله .ژبه باندې عاشق ؤ يعنې د پښتو ژبې ، پښتني كلتور ، خپل وطن او ملت سره يى عشق درلود او ښه مبارز ؤ . پوهاند رشتين د پښتو د اديب ، نويسنده او عالم په حيث د پښتنو لپاره ستر خدمتونه كړي دي. كه پښتانه هغه په اوږو وګرځوى بيا هم نه شي كولاى د هغه حقونه ادا كړي

ارواښاد پوهاند عبدالشكور رشاد

زه د پوهاند رشتين مړينه د پښتو ژبې ستره ضايعه بولم ، هغه پښتو ژبې او پښتنو ته ستر خدمتونه سرته رسولي دي.

استاد قتيل خوږيانى

د پښتو د ادب د هسك ځلانده ستورى ارواښاد پوهاند رشتين د پښتني فرهنګ او ثقافت په نړۍ كښې هغه ستره علمي او فرهنګي ضايعه ده چې وختونه به تير شي خو دا تشه به ډكه نه شي. پوهاند رشتين په هغه وخت كښې د پښتو د تعميم او ترويج لپاره خدمت كړى دى چې چا په زړه وره توكه د پښتو او پښتنو نوم نه شو اخستلاى.

جناب حضرت صبغت الله مجددي

د رشتين صاحب تخلص د هغه د نوم ترجمه ده . څنګه چې يى نوم رشتين ؤ ، هغسې په خپله هم صادق ؤ .پوهاند رشتين د سمندر مثال لري ، د هغه د خدمتونو څيړل دا معنى وركوي لكه سمندر چې څوك په كوزه كښې بندوي . د هغه خدمتونه د لمر په شان روښانه او ښكاره دي . هغه په دې لاره كښې خپل ژوند د ژبې ، ادب او فرهنګ خدمت ته وقف كړى ؤ او رشتين صاحب د پښتو ژبې او ادب د پاره ستر خدمت كړى دى . د افغانستان معارف د هغوي له كتابونو څخه پوره استفاده كړى ، د هغه خدمت د افغانستان د خلكو لپاره ستره سرمايه ده ، مونږ به دهغوي خدمات هيڅكله هير نه كړو.